习近平出席亚太经合组织第二十六次领导人非正式会议并发表重要讲话

شي جينپيڭ ازيا-تىنىق مۇحيت شارۋاشىلىق سەلبەستىك ۇيىمىنىڭ 26-رەتكى باسشىلار بەيرەسمي ماجىلىسىنە قاتىناستى ءارى ماڭىزدى ءسوز سويلەدى

ءوز حابارىمىز. ازيا-تىنىق مۇحيت شارۋاشىلىق سەلبەستىك ۇيىمىنىڭ 26-رەتكى باسشىلار بەيرەسمي ءماجىلىسى جەرلىك ۋاقىت 11-ايدىڭ 18-كۇنى پاپۋا-جاڭا گۆينەيانىڭ مورەسبي قالاسىندا وتكىزىلدى. مەملەكەت ءتوراعاسى شي جينپيڭ ماجىلىسكە قاتىناستى ءارى «ءداۋىر ورايىن يگەرىپ، ازيا مەن تىنىق مۇحيت ءوڭىرىنىڭ ورتاق گۇلدەنىپ-كوركەيۋىن قاراستىرايىق» دەگەن تاقىرىپتا ماڭىزدى ءسوز سويلەپ، مىنانى باسا دارىپتەدى: ازيا مەن تىنىق مۇحيت وڭىرىندەگى تاراپتار دۇنيە شارۋاشىلىعىنىڭ الەميلەنە دامۋ اۋقىمىنا سايكەسىپ، وڭىرلىك شارۋاشىلىقتى ءبىر تۇلعالاندىرۋ ماقساتىندا تاباندى بولىپ، اشىق دۇنيە شارۋاشىلىعىن قۇرۋ باستى بەتالىسىن يگەرىپ، ازيا-تىنىق مۇحيت وڭىرىنىڭ سەلبەستىك ارىنىن ساقتاپ، اناعۇرلىم جوعارى دەڭگەيگە قاراي قادام تاستاۋى كەرەك. ءماجىلىس باستالاردان بۇرىن، ءتوراعا شي جينپيڭ مەن ماجىلىسكە قاتىناسقان باسقا دا باسشىلار رەت-رەتىمەن ءماجىلىس زالىنا كىرگەن كەزدە، پاپۋا-جاڭا گۆينەيانىڭ زۇڭليى ونيەلل ولاردى قىزۋ مەرەيمەن قارسى الدى. 

ءماجىلىس جەرلىك ۋاقىت تۇستەن بۇرىن ساعات 10 نان 30 مينۋت وتكەندە باستالدى. ونيەلل ءماجىلىستى باسقاردى. ازيا-تىنىق مۇحيت شارۋاشىلىق سەلبەستىك ۇيىمى 26-رەتكى باسشىلار بەيرەسمي ءماجىلىسىنىڭ تاقىرىبى-«قامتىلىمدى دامۋ ورايىن مىقتى يگەرىپ، سيفرلى بولاشاق جاراتۋ». ماجىلىسكە قاتىناسقان ءارقايسى شارۋاشىلىق تۇلعالاردىڭ باسشىلارى «سيفرلانۋ بولاشاعىن تۇتاستىرىپ، قامتىلىمدى ارتۋدى جۇزەگە اسىرۋ» قاتارلى ءتۇيىندى كەڭەس تاقىرىپتارى جونىندە پىكىرلەسەدى، سەلبەستىك بارىسىن قورتىندىلايدى، ازيا مەن تىنىق مۇحيت وڭىرىنىڭ بولاشاعىن اقىلداسادى. 

شي جينپيڭ سوزىندە بىلاي دەدى: كەزەكتەگى دۇنيەدە دامۋ مەن وزگەرىس قاباتتاستى. تاريحي دامۋ ءۇردىسىنىڭ قيىلىسىندا تۇرعان بىزدەر دۇنيەنىڭ اۋقىمىن جىعا تانىپ، شارۋاشىلىقتىڭ دامۋ بەتالىسىن يگەرىپ،  داۋىرلىك تاقىرىپتاردى شەشۋىمىز كەرەك. 

ءبىرىنشى، وڭىرلىك شارۋاشىلىقتىڭ ءبىر تۇلعالانۋىن جەبەپ، ازيا مەن تىنىق مۇحيت وڭىرىنىڭ اشىق شارۋاشىلىعىن قۇرۋعا تاباندى بولۋ. ءبىز ساۋدا مەن قارجى قوسۋدى ەركىندەستىرۋدى، قولايلاستىرۋدى جالعاستى ىلگەرىلەتۋىمىز كەرەك. ءار ءتۇرلى ەركىن ساۋدا ورنالاستىرۋىنا قاراتا، ءبىز اشىق، قامتىلىمدى، جاريا بولۋ پرينسىبىنە تاباندى بولىپ، ءوزارا سايكەسۋدى كۇشەيتىپ، تاماشا ىقپالداستىقتى جۇزەگە اسىرۋىمىز كەرەك. ەرەجەنى نەگىز ەتكەن كوپ جاقتى ساۋدا جۇيەسىن باتىل قورعاپ، ساۋدا قورعامپازدىعىن تۋىمىز ايقىن تۇردە شەكتەۋىمىز ءتيىس. دۇنيە ساۋدا ۇيىمىنىڭ رەفورماسىندا كوپ جاقتى ساۋدا ءتۇزىلىسىنىڭ وزەكتى قۇنى مەن نەگىزگى پرينسىبىنەن اۋىتقىماۋ كەرەك. شارۋاشىلىقتى الەميلەندىرۋدى اشىق، قامتىلىمدى، جالپىعا پايدا جەتكىزەتىن، تەپە-تەڭ، ورتاق يگىلىكتەنەتىن باعىتتا دامۋعا باستاۋ قاجەت. 

ەكىنشى، جاڭالىق جاراتۋ قوزعاۋشى كۇشىندە تاباندى بولىپ، ارتۋدىڭ جاڭا قوزعاۋشى كۇشىن جەتىلدىرۋ. ءبىز «ينتەرنەت پەن سيفرلى شارۋاشىلىق قاريتا جوسپارىن» جالپى بەتتىك تەڭەستىرىپ جانە تياناقتاندىرىپ، سيفرلى شارۋاشىلىقتىڭ كومەسكى ارتۋ قۋاتىن جانداندىرىپ، سيفرلى نەگىزدىك قۇرىلعى مەن قۋات قۇرىلىسىن كۇشەيتىپ، سيفرلى شارۋاشىلىقتىڭ قامتىلىمىن ارتتىرىپ، سيفر بوگەتىن الاستاپ، تۇرلىشە دامۋ ساتىسىندا تۇرعان مۇشە ەلدەردى سيفرلى شارۋاشىلىقتىڭ دامۋ تابىستارىنان يگىلىكتەندىرىپ، ازيا-تىنىق مۇحيت وڭىرىندەگى حالىقتى سيفرلى شارۋاشىلىقتى دامىتۋ ورايىمەن قامداۋىمىز قاجەت. 

ءۇشىنشى، ءوزارا تۇتاستىرۋ تورابىن كەمەلدەندىرۋگە تاباندى بولۋ. ءبىز ءوزارا تۇتاستىرۋ جوسپارىن ىشكەرىلەي تياناقتاندىرىپ، 2030-جىلعى باياندى دامۋ كەڭەس تاقىرىبىن باستاماشى ەتىپ، كوپتەگەن ناقتى شارا قولدانىپ، دامۋدىڭ ءبىركەلكىلىگىن، ارتۋدىڭ باياندىلىعىن، ورايدىڭ تەپە-تەڭدىگىن، قوعامنىڭ قامتىلىمىن كۇشەيتۋىمىز ءتيىس. 

ءتورتىنشى، سەرىكتەستىك قاتىناستى كۇشەيتىپ، ورتاق سايىسقا بىرلەسىپ توتەپ بەرۋگە تاباندى بولۋ. ءبىز دامۋدى ورتاق قاراستىرۋدان اۋىتقىماي، سايىستى شەشۋ جولىن بىرلىكتە ىزدەستىرۋىمىز كەرەك. الۋاندىلىق ىسجۇزىندىگىن تياناق ەتىپ، ءار كىم ءوزى تاڭداعان دامۋ جولىن قۇرمەتتەپ، اشىق، قامتىلىمدى بولۋ نەگىزىندە ءوزارا توعىسىپ، ءبىر-بىرىنەن ۇلگى الىپ، ورىندى باسەكەمەن قاتار ءوزارا ءتيىمدى سەلبەسىپ، ازيا مەن تىنىق مۇحيت وڭىرىنىڭ تاعدىرلاس ورتاق تۇلعاسىن بىرلىكتە قۇرۋىمىز كەرەك. 

شي جينپيڭ مىنانى اتاپ كورسەتتى: بيىل جۇڭگونىڭ رەفورما جاساپ، ەسىك اشقاندىعىنىڭ 40 جىلدىعى. جۇڭگو رەفورمانى جالپى بەتتىك تەرەڭدەتۋدەن اۋىتقىماي، سىرتقا ەسىكتى اشىق ۇستاۋ نەگىزگى مەملەكەت ساياساتىنا تاباندى بولدى. جۇڭگو حالىقتى وزەك ەتكەن دامۋ يدەياسىنان جازباي، جاڭالىق جاراتۋ، سايكەستى دامۋ، اشىق ۇستاۋ، ورتاق يگىلىكتەنۋ سىندى جاڭا دامۋ كوزقاراسىن اتقاردى. جۇڭگو شارۋاشىلىعىنىڭ ۇزاق ۋاقىت ورنىقتى، تاماشا تۇلعالىق بەتالىسى جالعاسا بەرەدى. جۇڭگو ازيا-تىنىق مۇحيت وڭىرىندەگى ءار ەلمەن سيفرلى شارۋاشىلىق سەلبەستىگىن تەرەڭدەتىپ، ءتىپتى دە كوپ مۇددە توعىسۋ ءتۇيىنى مەن شارۋاشىلىقتىڭ ارتۋ ءتۇيىنىن جەتىلدىرىپ، ازيا-تىنىق مۇحيت شارۋاشىلىعىنا قۇدىرەتتى جاڭا قوزعاۋشى كۇش قوسۋعا پەيىل. جۇڭگو ءار ەلمەن بىرلىكتە ورتاق اقىلداسۋعا، بىرگە قۇرۋعا، تەپە-تەڭ يگىلىكتەنۋگە تاباندى بولىپ، «ءبىر بەلدەۋ، ءبىر جولدى» جوعارى ساپادا، جوعارى ولشەمدە، جوعارى دەڭگەيدە قۇرىپ، ازيا-تىنىق مۇحيت وڭىرى مەن دۇنيەدەگى ءار ەل حالقىنا اناعۇرلىم كوپ دامۋ ورايىن جاراتادى. شي جينپيڭ مىنانى باسا دارىپتەدى: ازيا-تىنىق مۇحيت وڭىرىندەگى ەلدەر باسشىلارىنىڭ ازيا-تىنىق مۇحيت شارۋاشىلىق سەلبەستىك ۇيىمىنىڭ 2020-جىلدان كەيىنگى سەلبەستىك بولاشاعىن ويداعىداي جوسپارلاۋ جاۋاپكەرلىگى بار. جۇڭگو ازيا-تىنىق مۇحيت سەلبەستىگىنىڭ بەلسەندى دارىپتەۋشىسى جانە باتىل اتقارۋشىسى. جۇڭگونىڭ دامۋى ازيا-تىنىق مۇحيتتاعى ءار ەلمەن بولعان تىعىز سەلبەستىگىنەن ايىرىلا المايدى، ءارى ازيا-تىنىق مۇحيت شارۋاشىلىعىنىڭ دامۋ كەڭىستىگىن كەڭەيتتى. جۇڭگو ازيا-تىنىق مۇحيت سەلبەستىك بارىسىنا ىشكەرىلەي ات سالىسىپ، ءار جاقپەن ناقتى سەلبەستىكتى تەرەڭدەتىپ، ازيا-تىنىق مۇحيت وڭىرىنىڭ دامۋى مەن گۇلدەنىپ-كوركەيۋىنە تىڭ ۇلەس قوسادى!

ماجىلىسكە قاتىناسقان باسشىلار بىلاي دەدى: ازيا-تىنىق مۇحيت وڭىرى شارۋاشىلىعىنىڭ دامۋ بولاشاعى جاقسى، الايدا ساۋدا بوگەتى مەن قورعامپازدىق سايىسىنا دا ۇشىرادى. كەزەكتەگى جاعدايدا، ءار قايسى جاقتار كوپ ۇيەكتىلىك پەن كوپ جاقتى ساۋدا ءتۇزىلىسىن باتىل قورعاپ، ساۋدا قورعامپازدىعىنا باتىل قارسى تۇرىپ، ازيا-تىنىق مۇحيت شارۋاشىلىق سەلبەستىك ۇيىمىنىڭ ساۋدا مەن قارجى قوسۋدى ەركىندەستىرۋدى، قولايلاستىرۋدى جەبەۋىن، سونداي-اق تەپە-تەڭ، جاسامپاز، باياندى، قامتىلىمدى ارتۋ قاتارلى جاقتاردا جالعاستى ماڭىزدى رول اتقارۋىن قولداپ، ازيا-تىنىق مۇحيت ەركىن ساۋدا رايونى قۇرىلىسىن ىلگەرىلەتىپ، جالىندى، اشىق ازيا-تىنىق مۇحيت وڭىرىن بىرلىكتە قۇرۋى كەرەك. ءار جاق ازيا-تىنىق مۇحيت شارۋاشىلىق سەلبەستىك ۇيىمىنىڭ 2020-جىلدان كەيىنگى سەلبەستىك بولاشاعىن تەزىرەك بەلگىلەپ، ءارقايسى شارۋاشىلىق تۇلعالاردا سيفرلانۋ مەن جاڭالىق جاراتۋ تابىستارىن جالپىلاستىرۋ ءتيىس.

شي جينپيڭ ازيا-تىنىق مۇحيت شارۋاشىلىق سەلبەستىك ۇيىمىنداعى شارۋاشىلىق تۇلعالاردىڭ باسشىلارىمەن بىرگە سول كۇنى تۇستەن بۇرىن دۇنيەنىڭ شارۋاشىلىق اۋقىمى جونىندەگى بەيرەسمي سۇقپاتقا قاتىناسىپ، حالىقارالىق اقشا قور ۇيىمىنىڭ باستىعى لاگاردتىڭ دۇنيەنىڭ شارۋاشىلىق اۋقىمى جونىندەگى تانىستىرۋىن تىڭدادى. 

اۋدارعان: گۇلنۇر قابىلقاق قىزى

监制:叶力夏提

审稿:夏力哈尔

翻译:古丽努尔

制作:达吾力

www.kazakcnr.com