مەكتەپتەن سىرتقى تاربيەلەۋ قۇرىلىمدارىن ٴتۇبىرلى وڭاۋ جونىندە

مەكتەپتەن سىرتقى تاربيەلەۋ قۇرىلىمدارىن ٴتۇبىرلى وڭاۋ جونىندەگى دابىل 

 جۋىردا، وقۋ-اعارتۋ مينيسترلىگى، مەملەكەتتىك بازار باقىلاۋ-باسقارۋ باس مەكەمەسى، شۇعىل جاعدايعا توتەپ بەرۋدى باسقارۋ مينيسترلىگى سىندى ٷش ورىن بىرلەسىپ «مەكتەپتەن سىرتقى تاربيەلەۋ قۇرىلىمدارىن كەمەلدەندىرۋدى ارناۋلى تەكسەرىپ، ٴتۇبىرلى وڭاۋعا قاتىستى ٴبىر قىدىرۋ قىزمەت مەحانيزمى جونىندەگى ۇقتىرۋ» دى باسىپ، تاراتىپ، ٴارقايسى وڭىرلەردىڭ زاڭ اتقارۋى جەتەرسىز، باقىلاپ-باسقارۋى كەمەلسىز بولۋ سىندى ماسەلەلەرگە قاراتا پارمەندى شارالاردى ورتاعا قويىپ، ٴارقايسى وڭىرلەردەن مەكتەپتەن سىرتقى تاربيەلەۋ قۇرىلىمدارىن وڭاۋ اياق الىسىن جەدەلدەتۋدى تالاپ ەتتى. 

 «ۇقتىرۋ» دا مىنالار اتاپ كورسەتىلگەن: ٴارقايسى وڭىرلەر وقۋ-اعارتۋ تاراۋلارى باستاماشى، بازار باقىلاۋ-باسقارۋ تاراۋلارى مەن شۇعىل جاعدايعا توتەپ بەرۋ تاراۋلارى بىرلەسىپ زاڭ اتقارۋ مەحانيزىمىن كەمەلدەندىرىپ، تاراۋلار ارا بىرلەسىپ زاڭ اتقارۋ تەبىنىن كۇشەيتۋ، مەكتەپتەن سىرتقى تاربيەلەۋ قۇرىلىمدارىن جاپپاي وڭاۋ اياق الىسىن تەزدەتۋ.

 ۇقتىرۋدىڭ ناقتىلى مازمۇنى تومەندەگىدەي:

وقۋ-اعارتۋ مينيسترلىگى كەڭسەسى، مەملەكەتتىك بازار باقىلاۋ-باسقارۋ باس مەكەمەسى كەڭسەسى، شۇعىل جاعدايعا توتەپ بەرۋدى باسقارۋ مينيسترلىگى كەڭسەسىنىڭ مەكتەپتەن سىرتقى تاربيەلەۋ قۇرىلىمدارىن كەمەلدەندىرۋدى ارناۋلى تەكسەرىپ، ٴتۇبىرلى وڭاۋعا قاتىستى ٴبىر قىدىرۋ قىزمەت مەحانيزمى جونىندەگى ۇقتىرۋى

وقۋ-اعارتۋ مينيسترلىگى نەگىزدىك اعارتۋ [2018] 10-ٴنومىرلى

 ٴارقايسى ولكە، اۆتونوميالى رايون، توتە قاراستى قالالارداعى وقۋ-اعارتۋ مەڭگەرمەسى(وقۋ-اعارتۋ كوميتەتى)، بازار باقىلاۋ-باسقارۋ تاراۋلارى، شۇعىل جاعدايعا توتەپ بەرۋدى باسقارۋ مەڭگەرمەسى(مەكەمە)، شينجياڭ ٴوندىرىس-قۇرىلىس بيڭتۋانىنداعى وقۋ-اعارتۋ مەكەمەسى، بازار باقىلاۋ-باسقارۋ مەكەمەسى جانە شۇعىل جاعدايعا توتەپ بەرۋدى باسقارۋ مەكەمەسى: 

 مەكتەپتەن سىرتقى تاربيەلەۋ قۇرىلىمدارىن ارناۋلى وڭاۋ قيمىلىن ورىستەتكەننەن بەرى، ٴارقايسى وڭىرلەر قات-قابات قيىنشىلىقتاردى جەڭىپ، باتىل قامال الىپ، بەلسەندى ىلگەرلەۋشىلىكتەردى قولعا كەلتىردى. كەزەكتە، وڭاۋ قىزمەتى قامال الۋ باسقىشىنا ٴوتىپ، ٴارقايسى وڭىرلەر ٴتۇرلى قيىندىقتارعا ٴدوپ كەلىپ وتىر. ورتالىق ايرىقشا كوڭىل ٴبولىپ، جالپى قوعام كوز تىگىپ وتىرعان بۇقارانىڭ ٴتول مۇددەسىنە ساياتىن بۇل اۋىر مىندەتتى جىل سوڭىنان بۇرىن ورىنداپ بولۋ ٷشىن، قىزمەت مەحانيزمدەرىن كەمەلدەندىرۋدى تومەندەگىدەي ۇقتىرامىز:

1. تاراۋلار ارا بىرلەسىپ زاڭ اتقارۋ مەحانيزمىن كەمەلدەندىرۋ

 ٴارقايسى وڭىرلەر، وقۋ-اعارتۋ تاراۋلارى باستاماشى بولعان، بازار باقىلاۋ-باسقارۋ تاراۋلارى مەن شۇعىل جاعدايعا توتەپ بەرۋدى باسقارۋ تاراۋلارى بىرلەسكەن زاڭ اتقارۋ مەحانيزمىن كەمەلدەندىرىپ، تاراۋلار ارا بىرلەسىپ زاڭ اتقارۋ تەبىنىن كۇشەيتىپ، مەكتەپتەن سىرتقى تاربيەلەۋ قۇرىلىمدارىن جاپپاي وڭاۋ اياق الىسىن تەزدەتۋ كەرەك.

 ٴارقايسى تاراۋلار زاڭعا قايشىلىق جاساعان تاربيەلەۋ قۇرىلىمدارىنا اكىمشىلىك جازا بەرۋ ينفورماتسيالارىن مەملەكەتتىك كاسىپورىن ينفورماتسيالارىن اشىق جاريالاۋ جۇيەسىندە تولىق جيناقتاپ، اشىق جاريالاپ، كۋالىكسىز تاربيەلەۋ جۇرگىزگەن، ٴپان تۇرىنە جاتپايتىن تاربيەلەۋ قۇرىلىمدارى پاندىك تاربيەلەۋ ورىستەتكەن، بەلگىلەمەگە قايشى تاربيەلەۋمەن شۇعىلدانعان قۇرىلىمداردى وقۋ-اعارتۋ تاراۋلارى باسقا تاراۋلارمەن بىرلەسىپ كۇشتەن قالتىرىپ، زاڭدىق ۋاكىلىنىڭ ورتا-باستاۋىش مەكتەپ وقۋشىلارىنا باعىتتالعان تاربيەلەۋ كاسىبىمەن شۇعىلدانۋىن شەكتەپ، بازار باقىلاۋ-باسقارۋ تاراۋلارىنا بۇل تاربيەلەۋ قۇرىلىمدارىنىڭ تيجارات كۋالىگىن زاڭ بويىنشا كۇشتەن قالتىرۋدى تالاپ ەتۋ كەرەك.

 ٴارقايسى وڭىرلەردەگى ورتتەن ساقتانۋ تاراۋلارى وقۋ-اعارتۋ تاراۋلارىن ورتتەن ساقتانۋ تەحنيكالىق ولشەم ماتەريالىمەن قامداپ، وقۋ-اعارتۋ تاراۋلارى وسى ولشەم بويىنشا تەكسەرىپ-بەكىتۋ، تاربيەلەۋ ورتالىعىن اشۋ ولشەمىنە تولمايتىن، ورتتەن ساقتانۋ حاۋىپسىزدىك ولشەمىنە جەتپەيتىندەرىنىڭ تاربيەلەۋ تولىمدىلىعىن زاڭ بويىنشا كۇشتەن قالتىرۋ؛ مەكتەپتەن سىرتقى تاربيەلەۋ قۇرىلىمدارىنا زاڭ بويىنشا ورتتەن ساقتانۋ باقىلاۋ-تەكسەرۋ جۇرگىزۋ ٴارى تۇرعىندار كوميتەتى(قىستاق) مەن قوجالىق قىزمەت وتەۋ كاسىپورىندارىنا ٴوز قاراستىلىعىنداعى جانە قىزمەت وتەۋ اۋماعى ىشىندەگى مەكتەپتەن سىرتقى تاربيەلەۋ قۇرىلىمدارىنا باعىتتالعان ورتتەن ساقتانۋ حاۋىپسىزدىك باسقارۋىن كۇشەيتۋدى تالاپ ەتۋ.

 ٴارقايسى وڭىرلەردەگى وقۋ-اعارتۋ تاراۋلارى كۇش توپتاپ، قوعامدىق باقىلاۋ ٴتۇزىمىن جولعا قويىپ، بۇل جۇمىسقا پەيىلدى بۇقارالار ىشىنەن قوعامدىق باقىلاۋشى ۇسىنىس ەتىپ، مەكتەپتەن سىرتقى تاربيەلەۋ قۇرىلىمدارىنا بولعان ۇنەمىلىك باقىلاۋدى كۇشەيتۋ كەرەك.

2. كۋالىك ٴبىتىرۋ قارقىنىن تەزدەتۋ

 ٴارقايسى وڭىرلەردەگى وقۋ-اعارتۋ تاراۋلارى مەكتەپ اشۋدى تەكسەرىپ-بەكىتۋ قارقىنىن تەزدەتۋ، اسىرەسە، ارناۋلى پاندىك تاربيەلەۋ قۇرىلىمدارىن ٴتۇيىندى تۇردە بەكىتۋ، ولشەمگە تولاتىندارىنا ماقۇلدىق حۇجات ٴتۇسىرۋ نەمەسە مەكتەپ اشۋ رۇحسات كۋالىگىن بەرۋ سىندى جولدار ارقىلى تەز ارادا بۇرىشتاپ بەرۋ، ولشەمگە تولمايتىندارىن زاڭ بويىنشا توقتاتىپ، وڭاۋ. وسى جىلدىڭ سوڭىنا دەيىن، تيجارات كنەشكاسى، رۇحسات كۋالىگى بولماسا دا تاربيەلەۋ جۇرگىزىپ وتىرعان قۇرىلىمداردىڭ كوزىن جويۋ.

 ٴارقايسى وڭىرلەردەگى بازار باقىلاۋ-باسقارۋ تاراۋلارى تىزىمدەۋ قىزمەتىن جاقسى ىستەپ، مەكتەپتەن سىرتقى ولشەمگە تولاتىن تاربيەلەۋ قۇرىلىمدارىنا تيجارات كۋالىگىن بەرۋدى تەزدەتۋ.

 ٴارقايسى وڭىرلەردەگى وقۋ-اعارتۋ اكىمشىلىك تاراۋلارى قاتىستى تاراۋلارمەن بىرلەسىپ، شۇعىل جاعدايعا توتەپ بەرۋ جٶباسىن جاساپ، كاسىپتەن توقتاتىپ، وڭاۋ تالاپ ەتىلگەن تاربيەلەۋ قۇرىلىمدارىنىڭ قاراجاتتى قايتارۋ قىزمەتىنە جانە بۇقارانى الاڭسىزداندىرۋ قىزمەتىنە ويداعىداي جەتەكشىلىك ەتۋ، ولاردىڭ بۇقارادان جيناعان قاراجاتتى قايتارماي، بوي تاسالاۋ سەبەبىنەن توپتىق وقيعالاردىڭ تۋىلۋىنىڭ الدىن الۋ.

 ٴپان تۇرىنە جاتپايتىن تاربيەلەۋ قۇرىلىم سانى ٴبىرشاما مول ولكەلەر(رايون، قالا) ٴونىمدى باقىلاپ-باسقارۋعا كەپىلدىك ەتۋمەن بىرگە، ولكە دارەجەلى وقۋ-اعارتۋ اكىمشىلىك تاراۋلارى بازار باقىلاۋ-باسقارۋ تاراۋلارىمەن بىرلەسىپ، ىسجۇزىندىك جاعدايعا ۇيلەسەتىن تۇلعالىق جوبا جاساپ، جىل سوڭىنان بۇرىن وڭاپ بولۋعا كەپىلدىك ەتۋ؛ «جۇڭحۋا حالىق رەسپۋبليكاسىنىڭ جەكەلەر اشقان وقۋ-اعارتۋ قۇرىلىمدارىن جەبەۋ زاڭى اتقارۋ بەلگىلەمەسى» رەسمي جاريالانىپ، اتقارىلعاننان كەيىن، ٴارقايسى وڭىرلەر بەلگىلەمە مەن «ۇقىقتى تومەنگە بەرۋ، باسقارۋدى كۇشەيتۋ، ۇكمەت فۋنكتسياسىنا بۇرىلىس جاساۋ» سىندى تۇلعالىق رەفورما رۋحىنا ساي، تاربيەلەۋدى تۇرگە ٴبولۋ، تۇرگە ايىرىپ باسقارۋ، مەكتەپتەن سىرتقى تاربيەلەۋ قۇرىلىمدارىن بەكىتۋدى باسقارۋ فورماسىن اناعۇرلىم كەمەلدەندىرىپ، كەمەلدى باسقارۋدى شىنايى كۇشەيتۋ كەرەك. 

3. ارحيۆتەستىرىپ تەكسەرۋ ماماندار ۇجىمىن قۇرۋ

 ٴارقايسى وڭىرلەردەگى وقۋ-اعارتۋ اكىمشلىك تاراۋلارى وقىتۋدى زەرتتەۋ بولىمدەرى مەن وقىتۋشىلاردى تاربيەلەۋ ٴبولىمى سىندى كاسىپتىك قۇرىلىمداردىڭ رولىن تولىق ساۋلەلەندىرىپ، ٴارقايسى ٴپاننىڭ وقىتۋشىلارى مەن زەرتتەرمەندەرىن ۇسىنىس ەتىپ، تاربيەلەۋ كلاستارىن سارالاۋ، تەكسەرىپ-بەكىتۋ قىزمەتىنىڭ تۇراقتى ٴارى جوعارى ورەدەگى ماماندار ۇجىمىن ٴپان تۇرلەرى بويىنشا قۇرىپ، مامانداردىڭ اتى-ٴجونىن قۇپيا ۇستاۋ قىزمەتىن جاقسى ىستەۋ كەرەك.

 ٴارقايسى وڭىرلەر مەملەكەتتىڭ ساباق ولشەمىنە نەگىزدەلىپ، «مەكتەپتەن سىرتقى تاربيەلەۋ قۇرىلىمدارىنىڭ پاندىك تاربيەلەۋ ارحيۆ ماتەريالدارىن سارالاۋ قىزمەت قولدانباسى» بويىنشا، سول جەردىڭ قىزمەت امالياتىنا ساي، سارالاۋ، تەكسەرىپ-بەكىتۋ ٴادىسىن عىلمي تۇراقتاندىرىپ، پاندىك تاربيەلەۋدە ولشەمنەن ارتىق، الدىن الا ساباق ٴوتۋ جاعدايىنىڭ بار-جوقتىعىن تۇراقتاندىرۋ قىزمەتىن جاقسى ىستەۋ كەرەك.

 اۋدان دارەجەلى وقۋ-اعارتۋ اكىمشىلىك تاراۋلارى اكىمشىلىك باسقارۋ اۋماعىنداعى ٴتۇرلى تاربيەلەۋ قۇرىلىمدارى اشقان پاندىك تاربيەلەۋ كلاستارىنىڭ اتى، تاربيەلەۋ مازمۇنى، وقۋشى قابىلداۋ وبيەكتى، ساباق قارقىندىق جوسپارى، ساباق ٴوتۋ ۋاقىتى سياقتى ارناۋلى ماتەريالداردى ارحيۆتەستىرىپ تەكسەرۋ قىزمەتىن دەرەۋ سوڭىنا شىعارىپ، تەكسەرۋدەن وتپەگەن كلاستاردىڭ وقۋشى قابىلداۋىن كۇشتەن قالتىرۋ كەرەك.

4. باسقارۋ-قىزمەت وتەۋ تەكشەسىن قۇرۋ

 وقۋ-اعارتۋ مينيسترلىگى مەملەكەتتىڭ مەكتەپتەن سىرتقى تاربيەلەۋ قۇرىلىمدارىن باسقارۋ-قىزمەت وتەۋ جۇيەسىن قۇرىپ بولدى، الدا، ولكە، قالا، اۋدان ٷش دارەجەلى وقۋ-اعارتۋ اكىمشلىك تاراۋلارىنا جۇيەلىك باسقارۋ ٴنومىرىن تاراتىپ بەرگەن سوڭ «مەملەكەتتىڭ مەكتەپتەن سىرتقى تاربيەلەۋ قۇرىلىمدارىن باسقارۋ-قىزمەت وتەۋ تەكشەسىن مەڭگەرۋ ٴادىسى» نە ساي ناقتىلى مەڭگەرۋ جۇرگىزسە بولادى. اۋدان دارەجەلى وقۋ-اعارتۋ تاراۋلارى قاتىستى ينفورماتسيالاردى دەركەزىندە جاڭالاۋعا، قالا جانە ولكە دارەجەلى وقۋ-اعارتۋ تاراۋلارى جيناقتاپ باسقارۋعا جاۋاپتى بولادى. مەكتەپتەن سىرتقى تاربيەلەۋ قۇرىلىمدارىن اداقتاۋ، وڭاۋ، تەكسەرىپ-بەكىتۋ، پاندىك تاربيەلەۋ تۇرلەرىن ارحيۆتەستىرۋ سىندى جۇمىستار تۇگەلدەي وسى تەكشە جۇيەسى ارقىلى ورىندالىپ، بۇكىل بارىس جىڭىشكەلىكپەن، مۇلتىكسىز باسقارۋدى جۇزەگە اسىرادى.

 مەكتەپتەن سىرتقى تاربيەلەۋ قۇرىلىمدارىنا ساياتىن ساياسات، ۇنامدى-ۇنامسىزداردىڭ اق-قارا تىزىمدىگى جانە پاندىك تاربيەلەۋ كلاستارىنىڭ ينفورماتسياسى قوعامعا اشىق جاريالانادى، بۇقارالاردىڭ توراپقا شىعىپ جاعداي يەلەپ، ولاردىڭ اۋ-جايىن ٴبىلىپ، قولايىنا جاعاتىن قۇرىلىمدى تاڭداۋىنا تاماشا وراي جاراتىلادى. سونىمەن بىرگە، تەكشە ارقىلى بۇقارادان ارىز-شاعىم قابىلداپ، تۇتاس قوعامنىڭ باقىلاۋىن قارسى الادى. ٴارقايسى وڭىرلەردەگى وقۋ-اعارتۋ اكىمشىلىك تاراۋلارى بۇل تەكشەنىڭ يقۋاتى مەن رولىن كەڭ كولەمدە ۇگىتتەۋدى كۇشەيتىپ، جالپى بۇقاراعا حاباردار ەتۋلەرى كەرەك.

5. توراپتا تاربيەلەۋدى باقىلاپ-باسقارۋدى كۇشەيتۋ

 ولكە دارەجەلى وقۋ-اعارتۋ اكىمشىلىك تاراۋلارى ورتا-باستاۋىش مەكتەپ وقۋشىلارىنا باعىتتالعان عالامتور تەحنيكاسى ارقىلى توراپتا ٴتالىم-تاربيە جۇرگىزۋ قيمىل قۇرىلىمىن ارحيۆتەستىرۋ قىزمەتىن مىقتى ۇستاپ، كىرەر اۋىزدى قاتاڭ مەڭگەرىپ، توراپتان سىرتقى تاربيەلەۋ قۇرىلىمدارىن باسقارۋ ساياساتىنا ساي، توراپتىق تاربيەلەۋ قۇرىلىمدارىن تۇتاس ولشەمدەستىرۋ كەرەك.

 توراپتىق تاربيەلەۋ قۇرىلىمدارى اشقان پاندىك تاربيەلەۋ كلاستارىنىڭ اتى، تاربيەلەۋ مازمۇنى، وقۋشى قابىلداۋ وبيەكتى، ساباق قارقىندىق جوسپارى، ساباق ٴوتۋ ۋاقىتى سياقتىلاردى ٴوزى تۇرعان ورىنداعى ولكە دارەجەلى وقۋ-اعارتۋ اكىمشىلىك تاراۋىنا، ٴسوزسىز، ارحيۆكە الدىرىپ، وقىتۋشىنىڭ اتى-ٴجونى، سۋرەتى، ساباق وتكەن كلاسى، وقىتۋشىلىق سالاۋات كۋالىك ٴنومىرى سياقتىلاردى توراپتىڭ كوزگە وڭاي تۇسەتىن ورنىنا اشىق جاريالاۋى شارت.

 ولكە دارەجەلى وقۋ-اعارتۋ تاراۋلارى ونەركاسىپ جانە ينفورماتسيا، توراپ ينفورماتسياسى سىندى ورىندارمەن تىعىز سەلبەسىپ، توراپتاعى تاربيەلەۋ مازمۇنىنا بولعان باقىلاۋ-باسقارۋدى كۇشەيتىپ، تاربيەلەۋ ٴونىمىن جوعارىلاتۋعا كەپىلدىك ەتىپ، كوپ ٴتۇرلى وقۋ-اعارتۋ قىزمەت وتەۋىمەن قامداۋدان سىرت، ورتا-باستاۋىش مەكتەپ وقۋشىلارىنىڭ باسى ارتىق جۇگىن شىنايى جەڭىلدەتۋلەرى ٴتيىس.


وقۋ-اعارتۋ مينيسترلىگى كەڭسەسى

مەملەكەتتىك بازار باقىلاۋ-باسقارۋ باس مەكەمەسى كەڭسەسى

شۇعىل جاعدايعا توتەپ بەرۋدى باسقارۋ مينيسترلىگى كەڭسەسى

2018-جىلى 11-ايدىڭ 20-كۇنى

اۋدارعان: قاۋسىلقان قاسىمقان ۇلى(تورابىمىزدىڭ ۇسىنىس ەتىلگەن ٴتىلشىسى)

监制:吴新日

审稿:达吾力别克

翻译:哈斯吾力汗

编辑:努丽霞提